房屋問題係香港嘅深層次矛盾之一，而立法會會延至10月先收爐，政府話由依家至7月底政府計劃提交另外10項條例草案畀立法會審議，包括修訂《國旗及國徽條例》、有關金融業發展同《海洋公園公司條例》修例等，而就保障「劏房」租戶嘅修例工作方面，政府已根據有關工作小組提交嘅報告進行法律草擬工作，預料今年7月可將提交立法會，希望可以喺本屆立法年度獲通過。
政府尋日交代喺今年2月初提出將優先處理多項立法或修例嘅工作進度，話有關公職人員宣誓嘅條例將於本周五（21日）生效，民政事務局將公布現任區議員宣誓安排，而有關立法引入非本地培訓醫生喺港註冊，將於下月2日喺立法會首讀。
至於「起底」刑事化方面，政府會盡快完成法律草擬工作，目標喺本個立法年度提交立法會審議。關於立法加強舊式樓宇消防安全則未能趕及喺本屆會期提交條例草案，但保安局局長會親自督導立法工作，目標喺今年下半年進行公眾諮詢。
事實上，政府亦先後兩次就議員提出的私人條例草案給予書面同意，包括由議員麥美娟提出、已獲三讀通過嘅《2021年水務設施（水務設施規例）（修訂）條例草案》，亦已發出書面同意議員葛珮帆提出修訂《有組織及嚴重罪行條例》，加重針對瀕危動植物非法行為嘅刑罰。