政情：聘44人助發還產假薪酬 何啟明被批離地 似足羅致光
法定產假已由10周延至14周，僱主可以向政府申領4周法定產假薪酬，預計每年的開支涉及5億元。立法會人力事務委員會尋日就開會討論「發還產假薪酬計劃」的實施情況，多名議員關注發還產假薪酬科點解要聘請多達44人，形容係架構臃腫、架床疊屋。其中，議員鄭泳舜（Vincent）就炮轟前議會同事、勞工及福利局副局長何啟明，質疑佢跟咗局長羅致光之後變得離地！
Vincent提及何啟明擔任議員期間儘管工作繁重，但何當時有冇40位同事幫手做嘢？質疑當局要請咁多人手實在過唔去，又問何可否叫羅致光貼地啲？何啟明回應時就反駁，話自己以前喺議員辦事處雖然只得幾個同事幫手，但就強調當時會經佢手嘅錢並冇5億元咁多。
死撐要人手監察 精準發放
另一議員姚思榮亦質疑發還產假薪酬科人手過多，建議當局考慮合併員工嘅職能。何啟明就強調，目前部門係需要人手作監察，精準發放產假津貼，但就話當局會檢討如何提升效益喎。