政情：自動停車試真啲 田二少扮障礙物
立法會交通事務委員會準備討論有關本地自動駕駛車輛規管框架嘅建議。喺討論之前，一班立法會議員尋日就應某電動車生產商之邀，了解一下乜嘢係「車輛召喚功能」，除咗可以用手機應用程式（App）指示架車慢慢行駛，附設嘅感應器一旦遇上障礙物就會自動停車。議員田北辰（田二少）為咗試真啲，竟即席扮演「障礙物」，喺架車前面行過，實測一下個功能咁話啊。
提醒「車輛召喚」在港未合法
田二少喺Facebook上載咗扮演「障礙物」嘅片段，見到佢輕鬆自如咁喺架車前面經過時，架車前進中亦自動停止，不過佢話呢個功能只係基本版，唔能夠自動調節將架車泊好。佢由此想到幾種情況，例如架車並未扭正咁停泊，咁仲開唔開到門呢？又話如返嚟攞車時發現另一架車泊得好貼，開唔到門又點算？佢引述車廠話，進階版功能處理到呢個問題，但與此同時政府都要考慮係咪放寬呢個功能並納入規管。
對於自動駕駛呢項科技已成全球大勢所趨，田二少話當然希望可以做得好。之但係，佢質疑「自動停」係咪萬試萬靈、無人駕駛是否保證安全，話仲有待驗證喎，佢又提醒準買家，上述嘅「車輛召喚功能」喺香港仲未合法使用。