政情：懲教署依足規矩 林卓廷冇得留鬚
為咗外觀上予人成熟嘅感覺，男士會選擇留鬚。前議員邵家臻尋日到赤柱監獄，探望參與「35+」民主派初選而被還押嘅前議員林卓廷，之後喺社交平台貼文交代林嘅近況，當中提到林打算喺監房留鬚，但礙於懲教署規矩，惟有繼續保持嘴上無毛嘅形象。
話說林卓廷平日已經有意留鬚，但奈何遭到太太制止，但即使如今身陷囹圄，仍然唔可以留鬚，因為按懲教署規矩，還押人士於還押嘅時候樣貌如何，喺監房嘅樣貌也必如何；即是話無鬚嘅人唔可以有鬚，有鬚嘅人唔可以剃鬚，因此林卓廷就算無咗太太嘅阻撓，懲教署一視同仁嘅規矩，亦令佢同留鬚無緣咁話。邵又話林卓廷頭髮雖然長咗，但總算食得瞓得，鐵窗下靠捉棋、讀書、寫信同做運動來消磨日子，又會應付囚友關於申請公屋、同案件問題查詢。