政情：正生籌款 陳兆焯對政府冇期望
國際青年商會香港總會尋日舉行「十大傑出青年選舉2021」啟動禮，場內見到曾喺2000年獲選十大傑青嘅正生書院校長陳兆焯，問到近呢幾年傑青同佢當年有乜嘢分別？佢就話年輕化咗，好有活力，仲話要成為傑青嘅重要元素係關懷別人同關懷社會嘅心。
香港經歷2019年反修例風波，社會動盪再加上疫情，年輕人參選傑青嘅意欲會唔會降低呢？佢話知道有朋友離開香港，但亦有好多年輕人選擇留喺香港，繼續貢獻社會發揮所長。問到有好多年輕人提出一啲好意見，政府會唔會配合到？佢相信如有好建議政府都會考慮。
感謝市民大力支持
佢仲話，有好多社會服務都係由市民自發開始，舉例正生喺半年前搞咗一個籌款活動，都係有賴一眾市民大力支持參與，遠遠大過政府幫助。問佢有冇失落感，佢就好肯定話冇，因為一向都係靠自己努力，冇其他期望就唔會有失望。
講番十大傑出青年選舉，公開提名期直至7月5日，參選者來自5個職業界別，包括「公共及社會服務」、「工商業」、「教育」、「演藝、康體、文化及藝術」及「專業工作」，獲提名人士將會先由甄選顧問進行甄選，通過初選嘅候選人再經評審團進行面試。