政情：檢測寫成接種 勞工處想搵外傭打針填數？
近日新冠肺炎變種病毒鬧得全城恐慌，政府之前要求37萬外傭喺5月9日前接受強制檢測。話說勞工處尋日發出嘅新聞公布，提醒外傭要盡快檢測，但竟然將已有13萬外傭預約喺5月5日至9日檢測，寫咗成「在檢測中心接種疫苗」。如今疫苗副作用嘅陰霾揮之不去，接種率又未如預期，莫非個政府為咗「谷針」，無所不用其極？
中英文版都錯
勞工處喺尋日朝11點幾發出新聞公布，將檢測寫成打針，而且唔止中文版本寫錯，英文亦寫成接種疫苗。事隔約一個鐘，勞工處先至如夢初醒，知道出錯，嗱嗱聲出番個修訂版本，更正補鑊。其實政府近排成日反駁「谷針論」，話自己冇「谷針」，今次自己出稿都寫錯檢測做打針，真係令人啼笑皆非，難免畀市民笑唔夠數，想搵埋外傭打針填數。