政情：租場突被取消 龔靜儀轟民政處失當
話說由執業大律師龔靜儀成立嘅「龔靜儀讀者會」喺上年10月已入紙申請租用西營盤社區中心禮堂，更已派發入場券，同聘請音響師、化妝師同攝影師在場協助，原定上周六演出，點知中西區民政事務處上周五先通知話場地要用嚟做檢測中心，所以取消當日場地租用安排。
該會及後發現檢測中心尋日先正式運作，而前兩日只係預留場地。龔靜儀接受查詢時話呢個場地過去曾做檢測中心，場內已存放部分物資，質疑處方未有顧及受影響人士情況，只為自己方便，就趕住喺辦公時間趕急決定取消租出場地安排，但又未有妥善運用場地，認為處方浪費緊資源。
斥打爛音響化妝攝影師飯碗
佢不滿公務員每月薪高糧準，但冇體恤因疫情已大半年開工不足嘅打工仔，認為處方嘅決定絕對係打爛音響師、化妝師同攝影師嘅飯碗。佢又話唔少行動不便長者為睇演出，要長途跋涉去會場，但最後就摸門釘，令大家都好失望。
中西區民政處回覆查詢時就話因外傭要強檢，且人數眾多，政府會檢視同預留合適嘅場地，喺有需要時增設流動採樣站。處方亦喺申請租用場地嘅表格上提醒租用者，如有需要，處方可隨時更改就申請發出嘅批准，佢哋亦已盡早通知租用者有關安排。不過，民政處就冇回應上周六係咪有派員喺場內做準備喇！