政情：涉顛覆罪還押 劉頴匡忙趕曱甴
47名發起或參與去年民主派「35+」初選人士，涉嫌違反《港區國安法》，被控串謀顛覆國家政權罪，其中一名被告前民間集會團隊發言人劉頴匡仍然被還押。其女友頻頻探佢，日前就喺社交網站Facebook話曾參與反對修訂《逃犯條例》風波的市民「陳伯」一齊探佢喎，仲話獄中好多昆蟲曱甴，劉每日都忙於做清潔咁話。
洗髮露當清潔劑
劉嘅女朋友話同陳伯一齊探望劉，大讚陳伯好精神，思路亦好清晰。劉頴匡喺獄中好「忙」，由於囚室內都多昆蟲曱甴，而佢又唔敢殺生，聲稱係基於對死亡嘅敬畏喎，所以每日都花時間，用僅有嘅資源深層清潔整間房。佢仲話月尾用晒洗手液嘅時候，就轉用洗髮露充當清潔劑，又話用洗頭水抹完，全間房都會有好濃烈嘅薄荷味。