政情：研改議規杜絕拉布 謝偉俊倡減法定人數
鑑於泛民主派過往濫用點算人數程序喺議會拉布，建制派計劃再進行新一輪修訂議事規則以杜絕情況，包括限制委員會人數等。立法會議事規則委員會主席謝偉俊(Paul)指全世界嘅議會都冇香港咁嚴格，唔會要求有一半嘅議員在席，否認修例令議員有機會偷懶。
據了解議規會正研究修補濫用點人數嘅漏洞，不過《基本法》規定立法會會議嘅法定人數為不少於全體議員嘅一半，有關改革出現阻滯。Paul尋日出席網台節目時話，世上好多議會都冇呢類要求，英國議會甚至設有投票日，議員喺當日先需要現身。Paul話實際操作上根本唔需要全部議員在席，唔係坐喺度就代表做緊嘢。
轟泛民掌區會行為幼稚
同時係灣仔區議員嘅Paul又批評，現時由完全冇經驗嘅泛民掌控區議會，每次開會都好似小學生傾去旅行係搭船定踩單車，形容好幼稚、好離譜！佢又認為呢個現象皆因選民當日係投「憤怒票」，欠缺理性。