香港漁民長期面對避風塘停泊位不足。漁農界議員何俊賢（高佬賢）尋日喺立法會會議中，鬧爆運輸及房屋局多年嚟未能改善船隻停泊位嘅管理方式，導致「有錢人拎晒泊位」，呼籲政府盡快解決漁民面對嘅問題。
高佬賢話疫情期間，內地驗船受阻礙為漁民帶來不少煩惱，至於本地船隻停泊位不足嘅問題，更加係多年嚟未有改善，鬧爆運房局每次都只係「睇睇就算」。政府話未能完全掌握事件，明白避風塘停泊位緊張，將會向運房局「追數」，睇嚟運房局局長陳帆都走唔甩喇。
會後高佬賢又話，今個立法年度初期佢已經同政府反映，但4年嚟都冇結果。佢批評運房局曾經同佢落區視察，但都係冇進展，仲話咁簡單嘅事唔知點解搞咁耐，有時都難怪市民不滿政府，因為政府根本就唔聽人講嘢！
