政情：半億噴泉一鑊泡 民政署康文署難逃追數
造價高達半億、被坊間嘲為「小白象」嘅觀塘海濱音樂噴泉，上周四啟用之後隨即事幹多多，不但有地磚移位，日前更有人去到互動嬉水區用梘液沖涼，導致噴泉出現嘔泡奇觀。雖然康樂及文化事務署關閉設施進行善後，但尋日就有巿民前往康文署總部請願，促請署方加強巡視場地確保設施運作正常，亦有區議員揚言要向申訴專員公署投訴民政事務總署行政失當，亦會喺區議會大會上要求康文署交代維修費用等事宜。睇怕民政署署長謝小華同康文署署長劉明光今次有排煩喇！
觀塘區議會主席蔡澤鴻更批評音樂噴泉造價咁高，竟有地磚鬆脫移位，實在無法接受。
地磚不平 撼親頭命都冇
若果有市民因為地磚不平而發生意外，一旦撼親頭就隨時命都冇呀！至於噴泉嘅嘔泡問題，蔡就話區議會都有向相關政府部門口頭查詢，但對方唔係話「了解緊」、就係話「調查緊」，至於點解噴泉嘔泡都可以整幾日，難免惹人質疑噴泉嘅循環系統太過垃圾。佢話坊間向有聲音指噴泉唔值咁貴，而區議會早前通過向民政事務總署投訴要求查閱合約細節，睇吓可否縮減噴泉規模，但政府一意孤行企硬要做，依家事實勝於雄辯，個音樂噴泉值唔值咁貴市民係有眼睇㗎！蔡又話本周內會代表區議會向申訴署投訴民政署行政失當，而下月開區議會大會嘅時候，亦會向康文署「追數」，要求交代維修費用同埋細節。
促查是否有人刻意破壞
另一位觀塘區議員張培剛話，音樂噴泉開得幾日就要關閉，康文署難逃監管失職。雖則依家噴泉嘅保養期未過，但噴泉係康文署轄下嘅恒常項目，遲早署方都要自行負責維修費用，一定要全面檢查清楚噴泉冇事先可以收貨，唔好再出現「玩兩吓就地板移位、出泡就要維修等」嘅事情呀！唔單止區議員狙擊康文署，尋日亦有巿民到康文署總部請願，要求署方加強巡視場地，亦要就音樂噴泉損壞一事嚴肅跟進，立案徹查係咪有人喺公眾地方行為不檢，或者刻意破壞音樂噴泉，並要求署方向涉事人追討所有維修費用添呀。