政情：為本報撰寫專欄大半年 何志平感謝讀者支持
民政事務局前局長何志平於本報撰寫專欄至今逾8個月，佢話非常感謝《東方日報》提供平台，並於寫作過程中整理思想及感情，以及借平台結交新朋友，亦重交不少舊相識，何尤其感謝讀者嘅支持同鼓勵。同時亦感謝東方上下員工，令佢得以留意到關於寫專欄嘅技巧，以及需要注意嘅地方。
對社會發展有重新體悟
何笑言，過去大半年每日「交功課」寫專欄，生活變得規律化。佢提到，不單止寫咁簡單，更需要詳閱好多資料、整理思想、寫初稿，然後再慢慢優化，包括上網求證等，所有步驟均不可馬虎。每逢周末就要構思下個星期，五篇文章嘅題材、敍事角度及方向，而五篇都要有連貫性，而且係一個完整嘅故事。一日裏面，大約花3個鐘寫專欄，每次1,400字左右，呢個規律使佢對社會發展有重新嘅體悟，也重新再認識久違嘅香港。
何最初將專欄欄名取為「檻外人」，是希望以檻外人嘅身份觀看檻內人嘅事同人，一方面要投入，另一方面要超脫，佢冀未來同樣能夠以此心態關心香港。至於未來會否繼續撰寫專欄，佢話目前暫未有任何打算，會先抖一抖、 叉叉電，進一步自我修養，若然間中有牢騷想發表，或會喺個人網站寫上幾句，屆時再與一眾讀者相聚。而最初執筆抒懷，是為社會帶來一股清流，佢認為，只要香港人搵到自己嘅定位，知道要如何發展，靠港人嘅智慧，堅信香港會慢慢變得清涼，不再像以往那麼炙熱，迎來更好嘅明天。