中環出更：中國文化一定老土？ 金鈴：傳統亦可新潮
傳統中國文化畀人老土同古舊嘅印象，令年輕人避而遠之，但香港島婦女聯會（婦聯會）就唔認同，仲話新一年嘅方向係發展年輕化、多元化同專業化嘅特色！婦聯會主席、「金槌拍賣官」金鈴提到，中國文化與老土絕非對等，傳統文化同樣可以很新潮。
金鈴話為咗吸引年輕人，聯會將陸續推出旗袍、茶甚至酒品牌，用比較軟性嘅方法介紹中國傳統文化。佢解釋，就算飲茶都有很多禮儀同知識，載酒嘅瓷器圖案都有唔同嘅研究，希望向年輕人介紹多啲，提升佢哋嘅興趣。佢仲分享話，現時聯會會服就係自家推出嘅旗袍品牌，無論價錢、搭配都相當時尚，冀能夠被年輕人接受咁話。
趙娜倡多元化傳揚
副秘書長歐陽鳳盈就話，過去加入該會嘅年齡層大概都係40至50歲，甚或係退休後加入，入會後就會聽樂曲、參加講座等，但依家愈嚟愈年輕化，更有20多歲女士加入，聯會甚至有青年隊等，細至中學生便可加入，一齊做義工。佢話現時趨勢係凝聚年輕女性，先可做到更多嘢，包括發掘更多年輕人社交平台，邀請更多年輕人作宣揚推廣，如KOL等，潛移默化影響更多人。
至於宣傳事務委員會主任牟彤及康樂文化委員會副主任趙娜亦在場，作為專業茶藝師嘅牟彤，平時鍾意喺屋企同家人及小朋友一齊飲茶，不但可以增進感情，更可以體驗中國茶道嘅「清、靜、和、美」，佢明白年輕一輩喺一開始會對中國文化較為抗拒，但只要慢慢嘗試，培養興趣之後再逐步學習，自然能夠做到宣揚中國傳統文化咁話。
趙娜就話日本有和服、韓國有韓服，中國有漢服同旗袍就理應宣揚，加上近年興起中國風，更可以明星作為參考，配以網上打卡、直播或比賽等方式，多元化同全方位將中國文化傳揚出去。
卓妮