政情：泛民現割席潮 兩區議員各自退黨

加入新同盟超過10年嘅鍾錦麟，目前正被扣押喺赤柱監獄，已正式退黨。喺西貢區議會網頁嘅區議員簡介中，佢所報稱嘅政治聯繫一欄，昨日已刪走「新民主同盟」。而鄭文杰就喺社交網站發文，話同家人以及圈內、圈外嘅朋友思考良久，最終決定退出公民黨，而日後會繼續專注地區事務發展，關注民生事務喎。佢又話為咗朋友、家人、以至香港，應承大家會好好生活，過好每一日咁話。

公民黨先後有人被撤立會資格

查實兩黨真係禍不單行，早前已退出新同盟嘅包括譚凱邦同黎煒棠。而喺本月3日處理「35+」初選被告保釋申請時，代表被告譚文豪、郭家麒、楊岳橋同李予信嘅資深大律師、兼公民黨主席梁家傑，突然表示唔再代表4人，更加指4人已宣布退出公民黨。公民黨先後有黨員被取消參選同立法會議員資格（DQ），而爆發退黨潮。