政情：公民講場：改名成熱話 城大急解畫

繼舊年公開大學公開徵求新校名，城巿大學日前亦傳出有意更改校名嘅消息，話說該校有教授指目前嘅校名未能反映該校嘅學術與科研成果，應更改校名以配合該校嘅長遠發展。結果提議一出，隨即惹來坊間熱議並傳出多個含揶揄意味嘅新校名，嚇得城大校方發聲明話流傳嘅校名建議並非由校方提出，又話對更改校名一事沒有立場同定案咁話。正所謂「玫瑰即使換咗個名，也依然芬芳。」大學就算改咗校名，都無改其學術同科研成就。城大校長郭位與其煩惱於點樣改校名，不如集中精力搞好大學嘅發展啦。