政情：羅致光拒援失業大軍 為官避事應走人
疫情重創本港經濟，最新失業率更攀至7.2 %，但政府仍未有向失業同就業不足人士提供足夠支援。立法會尋日朝早討論有關議案，唔少議員繼續炮轟政府堅拒設立失業援助金，其中議員葛珮帆（EQ）發言時怒斥政府喺解決失業問題上懶理避事，仲覺得「為官避事平生恥」呢句說話好適合形容勞工及福利局局長羅致光，鬧爆佢唔想做或者冇能力做就走人，畀有能力嘅人頂上好過。
有關議案由議員陳克勤提出，而最終亦分別喺地方選區以13票贊成、1票反對及1票棄權，同埋功能界別以15票贊成、4票反對及1票棄權下獲得通過。雖然呢個議案喺舊年12月2號已經排咗上大會，但之後因為疫情等原因一直拖到尋日先傾到，好多議員都話估唔到今時今日討論呢個議題仍然好迫切，覺得一方面反映失業問題嚴重，另一方面就係更加凸顯政府避事唔做嘢，無視失業大軍嘅存在啊。
藉詞防濫用 拒設援助金
對於政府企硬唔設失業金，EQ就鬧爆政府話「擔心政策被濫用」只係藉口，反駁咩政策都有機會被濫用，仲暗寸政府「司法覆核夠會濫用，取消咗佢啦」。EQ又炮轟羅曾經係議員應該好明白市民苦況，質疑佢企硬唔整失業金只因避事，又認為「為官避事平生恥」呢句說話簡直為羅而設，認為羅冇心為市民，不如退位讓賢罷啦。
至於議員麥美娟就鬧，羅之前話「全世界都冇一個唔使供款唔使經濟審查嘅失業援助金制度，唔明點解香港要有」，麥就寸爆羅話「局長嘅偉大發明『保就業計劃』夠全世界都冇，咁你又做？」又指羅駁斥佢哋嘅意見冇用，為官者最緊要了解市民嘅痛、幫到市民先係叻。
失業綜援門檻高乏宣傳
議員鄭泳舜就指現時有26萬人失業，政府雖稱有失業綜援，但申請門檻太高且欠宣傳，只有近兩萬人領取。鄭又質問羅可否明白失業人士感受，唔好將佢哋變成數字或純粹學術研究嘅對象。然而鄭所講嘅失業綜援，申請人除咗要通過經濟審查，又要尋找每個月工作不少於120小時及收入不少於社署所定標準嘅有薪工作。然而當符合呢個條件，咁仲算係失業咩？
出名IQ高嘅羅致光回應時都火力十足，話高度建議議員睇吓立法會之前發布嘅失業金制度相關研究喎，相信佢哋睇完就會明點解本港唔適合推行。羅又認為本港嘅福利制度「比上不足、比下有餘」，又話未釐清咩叫「臨時」，擔心最後會變恒常政策啊。羅又透露局方嘅內部分析指，若發放3,000元失業金，就要1,000元行政費，仲要未計領取者定期會見專責福利官嘅行政開支，所以認為唔可以設立有關制度，覺得將資源放喺其他地方更有建設性喎。