中環出更：被舉報醉駕 李永達吹波仔
民主黨前主席李永達（高達）前年因違法佔領行動（佔中）案，被判煽惑他人作出公眾妨擾罪成，本來就要入獄8個月但獲緩刑兩年，當時引起社會唔少爭議。話說佢尋日晏晝又惹是非，有人報警投訴佢疑似醉駕，最後警察接報到場將佢帶上警車「吹波仔」，即係做酒精呼氣測試添啊！
錄得零度獲放行
據了解，有人報警話影到高達飲咗酒揸車，及後警車約3點幾到達沙田區議員岑子杰喺瀝源邨辦事處外位置，將李帶上警車進行呼氣測試，最後證實體內酒精濃度係零度而獲放行，當時社民連黃浩銘都在場陪住佢。被問到點解畀人舉報醉駕時，高達就話「作為政治人物，好多時有啲嘢，我都唔知點解」。
其實近年社會因為唔同嘅政治事件而嚴重撕裂，高達作為違法「佔中」嘅搞手之一，當年可獲輕判就已經引起社會部分人士嘅強烈不滿，尋日佢喺沙田竟然畀人投訴醉駕，睇怕佢平日都係得罪人多先搞到咁喇！
卓妮