中環出更：家庭事業兩兼顧 梁凱瑩籲婦女勿自我設限
現代女性不但能頂半邊天，喺某啲領域巾幗往往更勝鬚眉。日前城市女青年商會開啟年度活動「全港時尚專業女性選舉」，該會會長梁凱瑩指當今世代，男女地位雖平起平坐，然而礙於生理以及家庭角色等傳統觀念，姊妹們縱有抱負，但婚後生兒育女，全力照顧家庭而無奈放棄昔日夢想者，可謂比比皆是。
梁凱瑩回想前年自己懷有第二胎，仍繼續從事會務及競逐會長職務，向其他會員親身示範，只要協調得好，家庭事業可以兩兼顧，總之唔好自我設限，朝住目標努力前進。
楊穎琳：女性處事較圓滑
國際青年商會總會會長楊穎琳就指昔日嘅性別角色，係男主外、女主內，作為一家之主嘅爸爸必定出外謀生，而媽媽就負責照顧子女同家頭細務。但隨住社會變遷，當今婦女喺職場都佔有好重要嘅位置，尤其是對別人感受較為敏銳嘅女性特質，一旦遇上棘手問題多會傾向圓滑處理，可以同男同事互補長短。
歐陽鳳盈係時尚專業女性選舉2019年嘅得獎者。作為一個時尚專業女性，佢認為照顧好家人屬首要之務，因為事業女性要有所發揮，始終離不開家人嘅支持。歐陽鳳盈又話婦女喺家庭同工作以外，不妨參與義工工作，能夠幫助社會上有需要嘅人士，自己都會好開心。
香港中華總商會選任會董龍子明，就係今次選舉嘅其中一位評審。對於如何評審參選者，佢話要視乎參選人處理問題嘅手腕，以及如何實踐自己嘅理想同信念。佢又話女性兼顧家庭同事業所展現嘅強勁韌力，值得男士尊敬同學習。
卓妮