午飯時間，小施看見小柔嗰份迷你午餐，就問：「你做咩食咁少嘢，係咪減肥呀？」小柔答：「疫情反覆，上年到依家大部分日子唔係在家工作就係留喺家中抗疫，搞到肚腩大咗好多咪唔敢食咁多囉！」
小施說：「咁都要注重均衡飲食，仲有做運動都好重要o架！坐多過郁，冇足夠體能活動嘅生活方式，除了容易引致肥胖問題，仲會增加患上慢性疾病風險，例如心血管疾病及糖尿病等。」小柔大驚：「咁點算呀？你真係要幫幫我！」
小施說：「有冇聽過一種運動叫健步行？簡單嚟講即係以每分鐘步行50至100米嘅帶氧運動，我哋可以按自己能力同需要隨時隨地進行，可以話係一種男女老幼都適合嘅運動。如果使用計步器，專家建議每日累積8,000至10,000步以達致運動效果。」小柔問：「咁我要每日行幾耐先夠o架？」
小施答：「一般人嚟講每星期應該最少要有3日進行30分鐘或以上中等強度運動。如果你需要時間嚟適應呢個強度運動，可先以每段唔少於10分鐘分開進行，並每日累積30分鐘或以上就可以。」小柔說：「原來做運動係可以咁容易o架！」小施又說：「呢排好hit嘅洗腦歌就係提醒我哋『食得是福，平安是郁！』郁多啲除咗可以燃燒卡路里，仲可以強化心肺功能同免疫力、增強關節肌肉同肌腱力量等。」
小柔說：「咁我就坐言起行一陣就去健步行！」小施笑說：「咁又唔好咁心急！健步行都係一種中等強度運動，你記得要飯後一小時後先好進行運動，事前亦都謹記要做好熱身運動！」
職業安全健康局
www.oshc.org.hk