為減低疫情擴散嘅機率，政府耗用巨額公帑去研發及推廣「安心出行」應用程式。創新及科技局局長薛永恒尋日喺一個電台節目上吹噓話，該手機應用程式嘅下載量達3百幾萬，佔本港四成幾人口，值得欣慰喎。不過下載量係一回事，程式有幾可靠又係另一回事。早前先至有食肆爆疫，幫襯過嘅食客就算掃咗二維碼，過咗好多日都係零通知，所謂「安心」可謂名不副實。況且，若非規定進入政府處所同食肆都要掃「安心出行」二維碼的話，「自願」下載程式嘅巿民到底有幾多，實屬疑問。
