政情：泛民自私精上身 妄想醫療資源亂瓜分

長康診所須上山 預約常爆滿

現時青衣區內只有位處「山上」嘅長康診所提供公營夜診服務，預約名額亦經常爆滿，唔單止未能應付區內街坊需求，對青衣北嘅居民嚟講要「上山」求診亦的確幾唔方便。由於長康診所喺舊年二月起進行內部翻新工程，所以一度由青衣診所提供夜診等診所服務。不過隨住翻新工程已完成，有關診所服務亦遷回原址執行。

本身服務青衣邨選區嘅王必敏就話，區議會多年嚟持續向醫管局爭取增加青衣嘅夜診服務，可惜局方多次以資源唔夠為由，而未有解決呢個問題，又話過去有關疫苗注射及檢測計劃都係喺青衣北進行，反映政府都認為該處較方便且需求較大，認為依家可以做嘅就係喺現有資源上再作分配，強調係對青衣街坊較公平嘅處理方法。

梁永權籲齊心向醫管局爭取

一班區議員除咗批評醫管局以疫情為由缺席會議外，亦不滿王為咗滿足青衣北嘅居民需要，意圖削減青衣南嘅資源。其中建制派盛康選區區議員梁嘉銘就質疑，對方應該要求醫管局增加資源，而非將「現有資源左撥右撥」，又舉例指如果認為長發邨嘅巴士線較多，都唔會叫局方將相關路線調撥畀長康邨，鬧爆王嘅建議係自私嘅表現。該區區議員梁永權見到會上爭拗不斷就撲出嚟做和事老，話當部門未能平均分配資源時，區議會幫助街坊作調撥都未嘗不可，同時又覺得應該齊心向局方爭取增設夜診，希望大家唔好喺呢個議題上有咁嚴重嘅分歧喎。

其實喺呢件事上醫管局絕對係責無旁貸，如果部門能夠妥善分配及增加地區資源，又點會令一班區議員要喺緊絀嘅資源入面再「爭餅仔」啊？相信醫管局行政總裁高拔陞都要督促各醫院聯網，多啲落區聽取意見，作更靈活嘅資源調配，否則最後只會係一眾市民受苦。