中環出更：禁聚令放寬 黃進達盼重啟本地遊
潮屬社團總會早前舉行第十屆會董就職典禮，適逢政府放寬部分社交距離措施，包括容許食肆4人一枱。至於早前因疫情反彈而煞停嘅本地遊能否重啟，市民都相當關注。會董之一、旅遊業議會主席黃進達就話，放寬措施推出後，佢近期當務之急就係要約見業界商討，希望可以盡快重啟本地遊旅行團咁話。
黃進達提到，自己新年期間都好聽話，完全冇出去拜年，但最近禁聚令放寬咗，都要陸續約番啲業界出來，見吓面商討吓，希望可以盡快恢復業務，就算未有得通關，冇得出去旅行都好，都應該重新舉辦本地遊，畀業界抖吓氣。黃仲話，現時主題公園開放番，自己亦打算同仔女入場玩吓，雖然好難預約，但都會盡量早少少上網預訂，仲笑言邊間主題公園都冇問題，最緊要有氣氛，所以待疫情慢慢好轉，在可控制範圍，希望旅遊活動都可以做番嘞！
莊健成：要趁收緊前「飯聚」
至於常務會董胡炎松就話自己已經餓咗好耐！一見放寬社交距離措施，就即刻同老婆、家姐食飯，至於仔女就已長大成人喺外國生活，夫妻二人樂得清閒，所以冇得外出食飯實在太悶，晚巿開番就太好喇！向來致力研究及推廣潮汕文化嘅胡仲話，希望可以逐步恢復現場演講，事關佢唔太鍾意線上演講，嫌欠缺同台下觀眾互動交流嘅機會，以致對住鏡頭講講吓就情緒好低落，冇晒氣氛咁話。
副主席莊健成以及另一名常務會董章曼琪都喺現場，莊就大嘆現時仲未有得游水，惟有日日行山，又講笑話要趁社交措施再度收緊之前盡快搵人食飯，擔心突然又冇得「飯聚」咁話，仲話希望疫情能夠好轉，逐步放寬至6人，再8人咁加上去！章曼琪就呼籲大家，就算疫情好轉能夠外遊，都應留港消費咁話，話現時做生意唔容易，市民應盡力支持！
卓妮