中環出更：居民遮陣做渠管 謝偉銓驚嘆傑作
本港疫情揭示樓宇建築問題，唔單止見到渠管亂駁，仲有議員發現大廈外牆設置「遮陣」，唔通係另類嘅特色設計？原來係居民「自製」渠管，利用遮陣引水入坑渠，真係嘆為觀止喇。
舊樓亂駁喉播毒 靠創意補救
疫症橫行，大廈水渠同氣喉成為「播毒幫兇」，建築、測量、都市規劃及園境界議員謝偉銓（Tony）早前去深水埗區視察，發現外牆渠管、水管千奇百怪。見到有氣喉亂駁、橫空而出，甚至長滿植物。仲有渠管並無駁到坑渠口，喺失修漏水嘅情況下，居民竟然利用「創意」擋水，設置遮陣引水入坑渠。唔知仲以為係「藝術傑作」，真係要幾怪有幾怪啊。
對於屋宇署早前承諾會為兩萬幢、樓齡超過30年嘅私樓檢查外牆渠管。Tony話做到2022年先完成檢查，之後仲要維修，時間實在太長。要防疫抗疫、阻止播毒就要快啊！佢期望新一份財政預算案預留嘅10億元，以資助3,000幢舊樓業主維修渠管，可以盡快落實，換走失修同違規渠管，處理好都市衞生問題喇。
卓妮