政情：有相為證：短髮植潔鈴現身 賀郭芙蓉披嫁衣
話說有民建聯「小花」之稱嘅前東區區議員植潔鈴，上個月傳出退出政界兼轉行投身紀律部隊考督察嘅消息，仲連從政嗰陣嘅社交專頁都刪除埋。雖然唔少傳媒嘗試聯絡佢本人但係都搵佢唔到，真係從政壇蒸發咁。之但係，近日植嘅手帕交郭芙蓉披嫁衣，郭嘅一班好姊妹都去出席婚禮祝賀，而植同一對新人嘅合照，近日就見諸前離島區議員傅曉琳嘅社交平台。
咁啱放假可以參加郭嘅婚禮
喺傅上載嘅相片中見到，植依家已經剪咗學堂要求嘅短頭髮。聽同場嘅另一個好姊妹、青年發展委員會委員林琳講，原來植係因為好姊妹結婚，咁啱放假可以參加郭嘅婚禮。
至於林琳都有順便呻吓，自己依家肥咗好多，連裙都着唔落，但就好開心喺郭嘅婚禮當日終於有機會穿上，早幾個月前買落嘅高踭鞋啊。