中環出更：各行業疫境求存 李根興堅持自己信念
幾乎各行各業都受到疫情衝擊，之不過總有人諗到方法「疫」市賺錢。秘訣就係需要堅持同埋講求創意，諗諗新方法咁話。維多利亞青年商會日前舉行創意品牌逆境重生開幕禮，商舖基金行政總裁李根興（Edwin）出席分享心得，佢認為買賣商舖，同做人嘅方法類似，都係要相信自己、量力而為，而唔好一味事後抱怨，反而應該確定方向就實踐到底呀。
雖然政府調低非住宅物業嘅印花稅後，市場交投量有所上升，但疫情始終係影響市場嘅負面因素。Edwin話無論個市係升定跌，做生意嘅原則都唔變，一定要往自己覺得啱嘅方向去行。反而有啲人喺樓市好嘅時候抱怨太貴；樓市跌嘅時候，啲人又驚喎，佢反問做人咁樣點得呢？樓市唔好，Edwin話的確係搵少咗，但就起碼冇蝕錢，奉勸大家做人唔需要過分樂觀、但更加唔使過度悲觀呀。
林育泉鼓勵學生創業
專門發展「人魚運動」嘅維多利亞青年商會主席林育泉（Alan）都受到疫情影響，應對之道就係即刻改變發展路向，從而令公司承受少啲衝擊。Alan話公司培養學生後，都會鼓勵佢哋自行創業，甚至建立自己嘅團隊。一方面新嘅團隊需要協助；另一方面疫情下雖然人魚行業冇得進行水底拍攝，但都可以訓練番學生嘅管理營運能力以及指導技術等。
經營教練及導師學院嘅曾繁麗（Cecilia）話，教練指導嘅生意喺疫情下都受到影響，但都呼籲大家發掘多啲可能性、清楚訂立目標並採取行動發揮優勢。佢話疫情下儘管好多人嘅業務受到影響，但就為教練指導行業帶來機遇，話好多企業家都有意喺逆境開創可能性，所以都需要搵番個教練提醒番自身嘅盲點所在，從而突破逆境咁話。
卓妮