政情：梁君彥廖長江 叫自己友咪拉布

涉起底刑事化 公僕宣誓

政府喺二月初嘅立法會答問大會上拋出5項立法或修例工作，包括「起底」行為刑事化、訂明公職人員宣誓要求、引入海外醫生、制訂「劏房」租務管制同加強舊式樓宇消防安全，計劃喺今個立法年度將草案提交立法會審議或進行公眾諮詢。其中由前年黑暴風波引發不同政見人士互相「起底」問題，導致社會嚴重撕裂，政府將由修訂《個人資料（私隱）條例》入手遏止情況。

累積26條立法 時間緊迫

梁君彥喺網上節目話今年度立法會只剩低唔夠一半嘅時間，頂盡都係得番15至16次嘅立法會會議時間，加埋之前累積落嚟嘅立法同埋修例，足足有成26條立法咁多，所以佢都預咗嚟緊呢半年工作會好忙o架喇！佢話最希望議員唔好拉布啦！

奇怪嘞，自從舊年年底民主派議員總辭，離開咗立法會之後，出現拉布嘅情況少之又少，剩低鄭松泰同陳沛然兩個非建制派議員，亦玩唔出啲乜嘢花樣，唔通梁君彥係擔心建制派「自己友」會玩嘢？又抑或係政府嘅立法草案預備得太差，就連建制派議員都睇唔過眼要拉吓布？

之後，梁又話立法要順利通過都有賴法案委員會、各委員會及議員配合嘅，喺適當嘅場合討論適當嘅範疇，咁先可以提高議會嘅效率。

廖長江就重申，相信建制派仍然有一定嘅立法角色。佢都知道嚟緊半年嘅議程會好緊迫，但咪惟有盡力做好囉！佢話建制派議員會盡快審議涉及民生嘅草案，相信建制派係考慮通唔通過法案時對重大大原則都冇乜意見，但係法案嘅細節上就要細心研究，睇吓可以點樣令政策更加完善，更加可以惠及民生喎。