中環出更：疑甩名避稅 許正宇徐英偉 老婆自製首置物業
現時市民買樓時若本身持有一個物業，需要繳付15%額外印花稅，因此愈嚟愈多市民「甩名」後以首置身份買樓，財經及庫務局局長許正宇同民政局局長徐英偉都有用到呢個「甩名」方法，同屋企人一齊「自製」首置身份買樓。
陳家珮亦試過
上年4月上任嘅許正宇同太太及家人喺2010年4月，以4,199萬元買入大坑嘉崙臺物業，4人以聯權共有方式共同持有物業。去到2019年4月，業主再拆契改以分權共同持有，4人各持四分之一業權。其妻後來亦將業權賣畀許，再喺2019年以首置業主身份用8,600萬元，購入中半山一個單位，節省咗約925萬元印花稅。
同樣係上年上任嘅徐英偉同太太都喺2011年買咗九龍塘又一居一個高層單位，去到2014年10月二人再以920萬元將業權賣畀徐英偉一人全資擁有。徐太太就可以回復首置身份，並喺同月立即以1,700萬元購入又一居一個頂層複式單位，節省咗約63.8萬元嘅印花稅。
其實，新民黨嘅陳家珮（Judy）舊年二月都曾用過2,220萬元買入咗西半山豪宅雍景臺一個1,117平方呎嘅單位，有指佢都甩名「自製」首置身份入市，慳番240萬元稅款，Judy就話冇諗過要避啲咩辣招稅，又話：「咁我有Quota（限額）冇理由唔用o架嘛！」
卓妮