中環出更：制訂教育方向勿一意孤行 程介明：盼聽到學生心聲
香港近年大力推動科學、科技、工程及數學教育（STEM），目的係為咗未雨綢繆，迎合將來社會嘅需要。但大家又有冇諗過STEM係咪一眾莘莘學子想學習嘅嘢嚟呢？怕唔怕只係一廂情願、變咗另類嘅「填鴨式教育」呢？香港大學教育學院榮休教授程介明話制訂教育方向唔希望只係基於教育理念，更加希望聽到學生嘅心聲，以便更加配合佢哋嘅學習需要。
兒童議會早前舉辦會議，商討各種有關兒童嘅議題，包括促請政府喺中小學實行「應用啟發性學習」，以培養學童嘅創意思維。程介明提到現時嘅大局方向就係推廣STEM，而呢啲教育方向都只係基於教育理念，但學生可能有唔同嘅聲音喎，又或者學生認為唔應該將大部分時間都留喺學校，想要多啲時間學習其他真正有興趣嘅事。佢又舉例，話唔可以只係基於某本書定下政策框架，應該要「落場」了解各方聲音。
黃翠玲促性教育獨立成科
同場嘅香港政策研究所研究員馮智政(Jacky)認同有關講法，話教育政策尤其與別不同，係「由上而下」為學生構思學習需要，以致每次推行政策都好似係強迫性，要學生付出青春配合安排，所以處理每一步都要諗清楚，要了解學生嘅諗法，希望政府推行政策時拆牆鬆綁。Jacky亦講到依家社會動盪多變，好難預計未來十幾廿年嘅發展方向，以制訂相應嘅教育方向培育人才。
兒童議會亦涉獵到兒童被性侵犯嘅問題，防止虐待兒童會總幹事黃翠玲(Donna)話社會嘅性知識貧乏，建議將性教育獨立成科，喺性教育本質外，仲係一種生命教育，有助建立健康性格同培養良好嘅人際關係，甚至比起單一學科更加重要。Donna話依家冇全面嘅課程編排，而且人手不足，學校推行性教育嘅情況好參差，有啲學校一年只係用一句鐘涵蓋性教育，有啲甚至係零添，佢認為政府真係要正視情況。
卓妮