政情：觀塘區會輸波 怨運動設施不足
政府早前宣布重開足球場，唔少波牛都忍唔住要落場，包括一班觀塘區議員。該區區議會主席蔡澤鴻就覺得區內運動設施並唔足夠，尤其係俗稱「四彩」嘅佐敦谷同安達臣道新發展區。佢就話呢兩個公屋供應重鎮，規劃上以單位數目為先，缺乏社區配套，加上近乎用盡地積比率，即使依家想加設社福設施都好困難。
講番場波，原來係該區嘅區議會隊同區隊合演嘅賀歲盃。蔡形容區議會同區隊嘅關係都算唔錯，加上搞友誼賽以球會友，都可以畀年輕區議員同球員互相認識。佢又提到，雖然呢場波只有民主派區議員落場踢，但都有建制派同事到場觀賽，仲話希望下次再同區隊比賽時，唔同派別嘅同事都可以一齊落場踢添！
對於區議會隊今場以2比6落敗，蔡就大爆原來區隊本身已經放咗水，唔單止無限制換人名額，甚至派埋外援落隊幫手，仲自爆其中一個入球係由外援攻入添！被問到下次點樣一雪前恥時，佢就笑言要寄語一眾同事，忙碌區務之餘，都要抽時間練波。