中環出更：疫境另尋出路 黃麗嫦 手錶轉攻防疫用品
疫情導致商業市道陷入寒冬，企業唔想坐以待斃，就真係要另想出路。華人女企業家協會名譽顧問黃麗嫦（Esther）指經濟不景，惟食品同日常消耗品仲有得做，於是佢就將奢侈品範疇嘅手錶業務擴展至防疫殺菌用品嘅生意，而轉變嘅契機，就係舊年嘅口罩荒。
Esther話疫情爆發之初，全城搶口罩。而佢嘅手錶業務因以外銷為主，於是透過海外生意夥伴同公司的銷售人員喺東南亞同葡萄牙四出購買口罩然後速遞返港，但運費好高昂。印度嘅代理商有見及此，就向佢推薦越南同柬埔寨嘅口罩製造廠，佢去當地視察過廠房同生產設備，覺得成品可靠，於是就落單訂貨，以解決香港嘅口罩荒，後來疫情喺歐美地區擴散，奢侈品需求可謂一潭死水，但幸好佢可以將口罩賣往海外，得以彌補手錶生意上嘅損失。雖然依家市民對口罩嘅需求不如過往殷切，但佢認為經過今次疫情，市民嘅衞生意識一定有所提高，於是就轉移代理其他殺菌嘅用品嘞！
香港鐘表業總會前主席孫大豪指疫情令旅客絕迹，將生意對象聚焦於本地消費者，似乎係商戶唯一嘅選擇，但疫情未見曙光，好多受薪族都擔心飯碗不保，要賺本地人錢亦不容易，現時做生意，產品設計必須別具特色，先至容易吸引顧客購買。
林曉盈：時下講聰明消費
香港青年工業家協會執行委員林曉盈就喺舊年由生產手套嘅本業伸延至防疫產品嘅生意。佢認為市道不振，經營理念就要講求「聰明消費」，譬如佢研製嘅滅菌口罩售價雖接近百元，但可清洗200次，好迎合知慳識儉嘅消費者。今年佢再進一步將防疫產品推向時尚服裝嘅領域，由於生產手套嘅本業令公司掌握精良嘅縫製技術，要進軍時尚服裝可謂駕輕就熟。
卓妮