新冠病毒疫苗接種計劃已經展開，普羅大眾都好關注，疫苗保護率到底有幾高。疫苗顧問專家委員會召集人劉澤星就呼籲市民，唔好用數字去比較目前兩種抵港疫苗嘅成效，因為兩者嘅臨床研究對象未必相同，最緊要係疫苗保護率達致世衞標準喎。之不過，一般市民唔掌握免疫學等相關知識，評估疫苗成效冇可能唔講數字，若果真係要搬世衞標準出嚟，早幾日先至有政府專家顧問指出科興疫苗第三期初步臨床數據，有效率下限未達世衞標準！究竟專家嘅說話，信唔信得過㗎？
