政情：郭芙蓉結婚 葉劉飲「新抱茶」
農曆新年假期結束，但新正頭嘅歡愉氣氛又點可以停。議員葉劉淑儀（葉劉）尋日飲「新抱茶」，但係佢明明得一個女咋喎，到底係咩事呢？
為一對新人證婚
講緊嘅係新民黨社區主任廖添誠迎娶民建聯葵青區議員郭芙蓉（Jody）啊！簡直係「兩黨聯婚」，作為新民黨主席嘅葉劉當然要出席喜事，仲擔任證婚人添，一對新人都有向佢敬茶。葉劉話兩人公認係「朗才女貌，佳偶天成」。廖郭兩人係參與清華大學公共行政碩士課程而認識，葉劉仲大爆男方幾經努力下，先追求到才貌雙全、簡直係掌上明珠嘅Jody，佢望到都覺得好欣慰。
然而因疫情關係，婚宴有人數限制，不過一眾出席者都好歡樂，希望沾一沾喜氣。葉劉提到廖係獨生子，祝一對新人百年好合之外，仲要祝佢哋早生貴子。最好就每年添丁，令兩黨親上加親，增添更多小黨友喎！