中環出更：年年組隊挑戰毅行 徐汶緯：體格更強健
參與賽事，可能係促進恒常運動嘅好方法。稻苗學會主席徐汶緯，指從事餐飲業看似涉及體力勞動，但由於「近廚得食」，以致患上脂肪肝，或膽固醇過高者為數甚眾。學會方面有見及此，約5年前開始組隊參加毅行者，藉此鼓勵會員透過登山遠足來鍛煉體魄。之不過，為應付深秋舉行嘅賽事，早於盛夏就要進行集訓，艷陽酷暑嚇怕唔少人，以致最初一、兩年，響應嘅會員並唔踴躍。
然而抽過筋、流過汗，付出同收穫始終成正比。當大家都見到參與毅行者嘅會員體格大有改善，願意加入集訓嘅人就愈來愈多，結果近年嘅毅行者賽事，都要由廿幾人當中挑選狀態最佳嘅4人去組隊。而徐汶緯旗下嘅冰室，亦有組隊出戰，仲往往同稻苗隊並肩而行。雖則徐汶緯都有參與集訓，且隨時一起步行幾十公里，不過佢都係將參賽名額留畀其他會員，而自己就負責喺起步點送行、以及到終點迎接隊員。早幾日，徐汶緯就喺北潭涌，為準備出發嘅稻苗毅行隊打打氣。佢話毅行者不但要有充沛體能，團隊精神亦不可或缺，而多年來喺終點恭候隊伍完賽，Full team衝線嘅雖然唔少，但亦都有隊伍只係得番兩個隊員，甚至只剩一人完成最後路段嘅場面，佢都見過。
陳岳鵬橫風橫雨照跑
今次毅行者賽事有別於往年，因礙於疫情，籌辦活動嘅樂施會就將去年嘅賽事改為今年二月，以虛擬形式舉行，各隊伍可選擇一次過，或最多分4次行完一百公里。政制及內地事務局前副局長陳岳鵬（Ronald），首次同舊同學組隊參與，就選擇一次完成。不過賽事當日天氣欠佳，入夜之後是更橫風橫雨，渾身濕透加上氣溫下降，Ronald同隊友都幾乎凍僵，但幸好支援隊為佢哋帶來毛巾同發熱貼，但要有效保持體溫，最後30公里都要盡量跑，期間經過「大帽山蓮姐」嘅茶水亭，Ronald飲咗一支熱飲，又吞下蓮姐賞贈嘅茶葉蛋，頓感丹田暖和，繼而發力疾走，喺終點恭候嘅樂施會職員，都話佢哋嘅速度較預期要快。
香港工業總會名譽會長鍾志平，三十年前就已經參加毅行者賽事。佢話4位隊員若然步速一致當然最好，否則的話行路最快嘅隊員殿後，速度中等者領頭，最慢嘅兩位隊員居中，先至可以互相配合同照顧，齊上齊落咁完成百里路程。
卓妮