政情：半億音樂噴泉將竣工 區議員斥「航母變舢舨」
觀塘海濱音樂噴泉工程價高達5,000萬港元，惹起社會各界爭議，該區區議會曾通過埋動議，要求暫停工程，之不過政府就一於少理繼續動工，近日仲接近完工階段，兼且測試埋噴泉效果添。有區議員批評噴泉工程落差太大、貨不對辦。
與圖則對比落差大
近日網上有流傳噴泉工程接近完工嘅相，有圍欄將噴泉圍封，亦有指民政事務總署委聘嘅承辦商近日已經開始測試噴泉效果，測試時會有燈光隨水花地下射出，聽聞水花不大，視覺效果好似麻麻地。有指當局已經同工程承辦商討論緊交收程序，預計今年第二季就可以正式啟用。
觀塘區議會主席蔡澤鴻就批評，話日前佢收到網民拍攝嘅相，於是親赴現場視察，點知睇見都打個突。佢話工程圍封嘅範圍好大，令人覺得噴泉應該頗為宏偉，誰知實物面積不大，同當初嘅諮詢圖則對比，落差好大，形容係「航母變舢舨」。