中環出更：傳統亦要變通 陳仲尼將金融業結合商會
金融業向來對本港經濟相當重要，香港中華總商會（中總）尋日舉行新春傳媒聚會，本身從事金融業嘅副會長陳仲尼就提到，本港大趨勢係進一步將金融業發展壯大，故現時目標要努力將金融業融入商會。
陳表示，過去大家可能覺得中總主要係着眼於傳統行業，譬如製造業等，廠商佔大多數。但陳話，每個時期都要睇住形勢，現時金融絕對係最為重要，原因係愈嚟愈多新經濟來港上市，而本港經濟好多時靠金融，佢嘅角色就正正係如何將金融與商會會員結合，未來亦會多啲同政府溝通，作為商會與政府之間嘅橋樑咁話。
蔡冠深料市場情況慢慢好轉
至於名譽會長蔡冠深，同樣認為本港營商有一定優勢。佢表示，自從國安法實施後本港轉趨穩定，香港金融市場活躍，可見好多商家都仍然願意及有信心來港投資，做生意。但佢坦言，疫情令內部經濟唔係太好，商舖就自然難以繼續落去。佢仲笑言自己都係受害者，感嘆自己舖頭都唔掂，現時要丟空，但佢就話現時大圍經濟都如此，都怪不得人嘞！不過就相信情況會慢慢好轉。
至於去年11月上任嘅會長袁武，擔任會長已經一段時間，問佢感受如何？袁就感嘆，指近年經濟環境確實好差，自己都感到擔心，但現時示威活動大減，市面平靜咗，都算放心唔少，而目前嘅當務之急，係要盡快處理好疫情，加上疫苗逐步供港，當市民注射後集體免疫，相信經濟環境好快得到改善。佢又多謝會內一眾同事幫助，令佢喺呢個艱難時刻冇咁大壓力。卓妮