政情：過關檢疫煩 洪為民大呻不便
政府近年大力推動創科發展同青年創業，但香港寸金尺土、地少人多，創業成本高昂難免令人卻步。之但係仍有一心想創業嘅港青，就選擇以深圳為創業基地，皆因往來香港都算方便快捷，但喺疫情影響下，中港兩地形同封關，前海管理局香港事務首席聯絡官洪為民（Witman）都係咁講，話疫情對前海發展嘅影響好大啊，希望可能盡快通關咁話。
前海創業港青艱難
因為疫情關係，依家往返內地同香港嘅港人，前後需要隔離檢疫21日。Witman話據佢所知，好多舊年3、4月去咗前海發展嘅港人創業者都礙於檢疫期，到依家都未落返嚟，亦有啲留喺香港嘅前海創業者，因為唔想檢疫而搞到公司嘅內地戶口一直未開到。
至於Witman自己舊年都係上咗前海開會做嘢兩次，仲話雖然公務性質可以豁免檢疫，但程序都好麻煩，令佢唔想成日上去，大呻依家嘅方便程度相比起以前即日來回，仲可以食埋晏再返香港嘅情況真係差好遠啊。