中環出更：越洋行善非易事 黃琦雅：宜作期望管理
香港人嘅善心可謂無遠弗屆，除咗熱心響應城中公益，慷慨博施更會惠及發展中國家，不過早前有助養非洲兒童嘅善長，於社交平台爆出懷疑受騙嘅遭遇。香港女律師協會副會長黃琦雅（Angela）亦有助養非洲兒童，佢話受助人遠在千里之外，捐款人不但要了解負責配對受助人嘅慈善機構，自己亦要做好期望管理咁話。
Angela早前出席半島東扶輪社，向獨居長者派飯盒及福袋嘅活動。佢話相信各大慈善機構皆有其遠大目標，然而當架構愈發龐大，管理上就愈見困難。除非捐款後無意過問，否則參與助養嘅善長就要不時跟進情況，保持同受助人通訊，有機會的話最好就係來一次親身探訪，而助養對方去到邊一個地步，善長亦要想清楚。
至於Angela助養兒童，係緣於數年前到非洲探訪，與一隊過往曾受邀到港參與慈善演出嘅兒童合唱團重逢，於是佢就助養其中一位女童團員，而Angela亦有就助養劃界，當對方完成基礎教育以及離開院舍，助養就告一段落。而涉及今次助養嘅志願組織亦清楚講明，為免偏袒，佢嘅捐款會先集中於資金池，之後再向受助人發放應收嘅款項。點解非洲特別多小朋友需要外界助養呢？Angela認為原因眾多，而佢到訪烏干達就觀察到當地盛行一夫多妻，但男士少有為家庭負起經濟嘅重擔，以致喺匱乏環境中成長嘅小朋友比比皆是。
洪文正關注本地弱勢社群
講起到海外做慈善，半島東扶輪社創社社長洪文正（Alex）就試過到柬埔寨，到訪一所由港人開設，以當地孤兒為服務對象嘅兒童中心，送贈衣物同書籍等物資同義教英文。雖然係難忘嘅體驗，但Alex亦好關注本地嘅弱勢社群。佢話早前曾打算喺尖沙咀某酒樓設宴招待獨居長者食團年飯，但礙於疫情，結果同鄰舍輔導會合作，向居於石硤尾嘅老友記派發加餸飯盒，以及內有賀年禮物同防疫物資嘅福袋。
半島東扶輪社社長蔡金挺，都同意濟貧助弱，情況許可的話善長宜親力親為。去年嘅年三十，佢就親自向長者派發物資，但今年嘅慈善活動就因疫情而作出調整，佢哋將購買同收集得來嘅物資，透過義工送畀有需要嘅長者手上。卓妮