政情：陳梓維被網民「開年」 死撐助理可提前返工
話說油尖旺區議員陳梓維上周三喺Facebook貼文話辦事處「年十八」、即下月1日先啟市，畀大量網民圍插後，佢尋日凌晨就更新貼文，辯稱文中所用嘅詞彙用得唔正確，仲死撐話下月1日嘅期限係佢批准助理可以放到當日，助理只需要通知佢就可以選擇提前返工，或者在家工作喎。唔知係咪負評不斷，搞到佢要偷偷哋更新貼文解釋呢？
網民：你開工大家仲驚
其實喺農曆新年放吓假都係人之常情，但議辦要下個月先對外開放，就真係極為罕見喎，所以先惹嚟網民不滿。之不過，佢更新貼文後，唔單止話初一至初三需要放假拜年，要等到初四先回覆街坊，仲話只有建制派先會將議辦「年十八開放」理解為佢唔做嘢，最後仲好似帶有挑釁語氣，話如果大家唔明嘅話歡迎預約時間上去佢辦事處，等佢慢慢解釋畀大家聽。
解畫後，唔少網民繼續留言插佢。有人揶揄佢之前接到街坊求助後通知對家幫手一事，話「佢有返工同冇返工其實都冇分別，只要對家有開工咪得囉」，亦有人批評「乜政府畀你哋唔使開工咩？以為自己係皇帝？咁你16至31號係咪應該冇糧出？」亦有人笑指「你放假仲好，你開工大家仲驚」。睇嚟佢真係要好好檢討吓。