政情：建制小花植潔鈴 退出政壇轉考督察
往年每逢大年初四，唔少議員同區議員都會開爐落區同市民拜年，但之前做咗年幾東區區議員嘅建制派「小花」植潔鈴最近就好少現身，有知情人士向本報透露，植喺近一、兩個月已正式退出政圈，並轉行投考督察，而且早喺舊年已經萌生呢個念頭，據悉植都好適應依家離開政界嘅生活。
舊年已萌生念頭
有消息話佢入咗學堂，本報向知情人士打聽係咪屬實，佢就話「唔太方便答」，但就證實植的確去咗考督察，仲面咗試添！被問到植幾時退出政圈時，知情人士就話都係呢一、兩個月嘅事，佢仲透露植一直都對紀律部隊嘅工作有興趣，而植萌生棄政轉投紀律部隊嘅念頭就由舊年開始有。
問到係咪喺2019年區議會選舉敗陣後先咁諗時，知情人士就話「梗係啦，做緊（區議員）嗰時都冇時間諗啦」。至於另一知情者就話，知道植需要搞退黨手續，但依家程序去到邊就唔太清楚啦，不過佢都相信植之後都會繼續係一個服務社會嘅人嚟嘅。我哋亦有致電同發短訊向植查詢現況，惟截稿前未獲回覆。