中環出更：新正頭唔老利 民建聯街站冧檔壞咪
尋日年初四仲係農曆新年假期，有政黨朝早喺小西灣設新春街站派口罩同朱古力畀街坊，又收集市民對改革香港嘅建議。點知活動都未開始，街站就兩度「冧檔」，音響亦都失靈，新正頭咁搞法真係該煨，唔通「牛氣」太勁，街站都抵擋唔住？
怪風吹倒易拉架
話說民建聯議員李慧琼同張國鈞尋日朝早去到小西灣擺街站，突然吹嚟一陣怪風，將用嚟宣傳倡議變革香港嘅「易拉架」吹倒，工作人員即刻拉番起「易拉架」，點知另一面寫有「恭賀新禧」嘅橫額又被吹跌，認真手忙腳亂。工作人員好不容易掛番起橫額後，相隔數分鐘再次被風吹跌，只好用尼龍繩將橫額固定。
因為街站幾度冧檔，搞到活動遲咗少少開始，但當李慧琼正要發言，支咪就突然失靈，工作人員隨即遞多支咪畀佢，諗住兩支咪講嘢實無問題啦，點知仲係無聲出，最後要換第三支咪先得。新正頭又冧檔又壞咪，真係大吉利是！
話時話，財政預算案將喺下周三公布，李話雖然本港財赤高企，財政儲備仲有8,000多億元，覺得審慎理財之餘都要應使得使，叫政府唔好喺市民個人補貼上縮水啊。佢又話為免倒閉潮再現，政府應該畀行業有條件復業，同埋促請政府盡快安排市民接種疫苗後通關，以恢復經濟往來同兩地家庭團聚。
卓妮