政情：公民講場：港鐵系統問題多 陳帆唔好側側膊

港鐵事故頻生，近日東鐵嘅新信號系統亦問題多多。話說喺舊年5月試車時出現多宗事故後，已測試到有機會導致誤判衝燈，仲話已經處理好嘞，點知喺今個月初啟用後，竟然出現同樣嘅問題，而且好頻密發生。既然話已經改善同處理咗，點解又會咁呢？係咪港鐵內部有高層隱瞞內情？意外嘅嘢，一宗都嫌多，而且後果好嚴重，人命攸關，作為港鐵大股東嘅港府唔可以側側膊，運輸及房屋局局長陳帆唔通連港鐵都管唔掂？佢必須徹查事件，要港鐵向公眾交代清楚。