中環出更：港台爆疫憂中招 柯創盛自行做檢測
香港電台日前爆出有髮型師確診新冠肺炎，有員工隨即亦需要接受隔離。相關確診員工亦有負責電視節目，當中包括有時事節目《城市論壇》，所以有政界中人都心驚驚。早排有出席過《城市論壇》嘅議員柯創盛，亦為咗安全起見，尋日走去做檢測，預計最快今日有結果，所以尋日情人節兼結婚9周年紀念，都要同老婆分房瞓添！
同老婆分房瞓 臨時取消工作
柯創盛上星期日出席《城市論壇》，喺尋日港台爆疫後亦都有收到港台嘅電話，不過好彩原來個髮型師當日冇份幫佢，只係因為大家有身處同一間房，所以港台方面都勸喻佢去做檢測。而佢就話最近都覺得喉嚨有少少痕，所以今朝就拿拿聲去做檢測喇，仲要求同太太分房瞓，有需要時仲可能同太太去做檢測；本身安排好嘅工作亦都要臨時取消。
個髮型師今次冇份幫柯仔整理頭髮，而柯仔亦話好彩唔使隔離，但為咗安全起見，即刻通知同事，叫佢哋有需要就主動去做檢測。佢話本身自己都有做開檢測，佢話因為自己都成日要出入疫區，所以每隔三星期都會去做檢測，費事累己累人嘛！
卓妮