中環出更：着重儀式感 洪為民鍾情派實體利是
古時農曆新年家家戶戶都會喺屋企門口貼紅紙、再向小朋友派紅紙，寓意驅瘟避邪。啱啱過咗嘅鼠年被疫情籠罩，依家係牛年新正頭梗係想攞個好意頭啦！之但係今年政府呼籲大家盡量改派電子利是，話可以衞生啲喎，不過唔少人都同卓妮講，覺得派實體利是有儀式感啲，今年都係向親朋戚友派紅紙一封、大吉大利呀！
卓妮日前見到香港菁英會榮譽主席洪為民（Witman），雖然佢都好支持無現金社會，但始終電子利是喺香港都唔算太流行，加上都係覺得一封封利是派出去嘅感覺開心啲，所以自己都仲係派緊實體利是咋。之不過，如果同內地嘅朋友拜年，佢就會派電子利是嘞！
Witman仲話疫情下健身室成日被勒令停業，令佢都不知不覺養成行山嘅習慣，由以前一個月行3次山，到依家一個星期行3次山，甚至返工前去行早山添。Witman咁勤力，唔怪得望落去身材結實咗啦，連佢自己都話好似瘦咗添！
眼科醫生林順潮就話自己有發咗好多封電子賀卡出去，但係派利是都係鍾意實體版，好似傳統啲咁話。至於今年冇得長假期去旅行，佢本身就打算一家人去汽車露營，但預約已經爆滿，所以可能都係入西貢行山輕鬆吓就算。
葉慶寧改用視像拜年
至於法律博士陳清霞都係咁話，今年冇派電子利是，覺得傳統利是親切啲，又可以畀人估吓入面有幾錢。香港旅行社東主協會會長葉慶寧就話過年唔想聚集，今年改咗用視像拜年，佢仲大呻遲遲未通關，旅遊業冰封近一年，依家冇收入，仲每個月都要畀開支幾吃力咁話。
卓妮