政情：公民講場：保育質詢避得就避 古蹟辦放區會飛機

因懶得落場視察，以致逾百年歷史嘅主教山配水庫險遭摧毁，涉事嘅古物古蹟辦事處雖因此而遭坊間譏為「估即辦」，然而死性始終難改。深水埗區議會早前要求古蹟辦派員出席尋日嘅會議以回應質詢，誰知古蹟辦嘅代表並無現身，與會嘅區議員都話不能接受，怒轟古蹟辦係誤殺古蹟嘅兇手，以為學人玩失蹤，保育配水庫一事就可以側側膊。其實當初古蹟辦肯行多兩步去實地視察，後來就唔會搞出個大頭佛啦！依家缺席會議，問題唔會就此解決。古蹟辦執行秘書蕭麗娟不如老老實實，派代表向區議會坦白交代仲好啦。