政情：有人扮社區幹事造謠 周浩鼎斥可恥
政府最近多次「快閃」封區做強制檢測，有人趁機「搞搞震」，誤傳消息之餘仲假扮社區幹事添。議員周浩鼎（Holden）尋日就喺社交平台發文，話有人冒認社區幹事李啟立，仲喺社交媒體散播謠言，佢會就此事報警。
我哋其後向Holden查詢，佢話元朗安興街好彩洋樓前日封區，佢同議員梁志祥落區視察嘅時候，發覺有不實資訊喺坊間流傳，指周邊幾幢樓都可能會封。Holden指摘散播謠言，行為不負責任，容易引起市民恐慌及焦慮。點知有人仲變本加厲，假扮社區幹事，佢直斥可恥並譴責事件！
引證須盡快立假新聞法
佢話李啟立已經去咗元朗警署報警，而佢亦都向警方嘅網絡安全及科技罪案調查科備案，希望盡快揪出散播謠言嘅人士。Holden話最近嘅情況，更加引證政府有必要盡快就打擊假新聞訂立假新聞法，希望可以有效、專門應對呢啲惡行咁話喎！