中環出更：難忘做清潔工瞓籠屋體驗 田北辰斥政府講極唔聽
本港嘅劏房環境惡劣係眾所周知，但政府舊年先成立工作小組，研究推行劏房租務管制。議員田北辰（田二少）忍唔住重提往事，話佢早喺10年前參加節目，做清潔工、瞓籠屋已經知環境有幾咁不堪入目，批評政府講極唔聽，要加快動作實施租務管制先好啊。
田二少喺2010年參加真人騷，唔單止要做掃街清潔工，仲要住籠屋。睇嚟佢對呢段經歷好難忘，多年來敦促政府要推行租務管制。田二少喺近日嘅立法會房屋事務委員會上，對於政府「劏房」租務管制研究工作小組話最近去視察惡劣嘅劏房環境，田二少直言覺得好奇怪，因為佢早喺10年前已經知道有關情況，不過係政府講極唔聽啫。
憂租務管制好心做壞事
於會議上，田二少好關注劏房嘅定義，擔心分間出嚟嘅床位、板間房會唔會被涵蓋喺租務管制內。當獲得小組主席梁永祥回覆，將來會包含所有不適切單位，田二少更難掩興奮之情，話包埋床位「Very Good」，仲畀埋手指公多謝梁永祥添。
田二少都擔心租務管制只係限制原租約升幅，但經營新劏房嘅業主，可能喺訂第一張合約嗰陣，將租金提高，促政府要同時審視租金水平，避免「好心做壞事」，拉高晒啲租金啊。
卓妮