中環出更：疫情艱難 黃楚淇：慈善工作更顯重要
疫情困擾本港已超過一年，不但妨礙好多機構嘅運作，就連慈善活動都要延期或告吹。仁濟醫院副主席黃楚淇（Macy）話處境雖然係艱難，但依家更加係慈善工作發揮作用嘅時候。
金銀業貿易場慈善基金聯同扶輪社早前搞咗個活動，向多間慈善團體分發逾2,000個福袋，然後再派贈畀有需要嘅人士，而仁濟醫院就係其中一個參與計劃嘅慈善團體。提到疫情下做慈善服務，Macy慨嘆疫情反覆、防疫措施不時變更都打亂佢哋活動嘅部署，但無論如何，探訪活動都要全力以赴，尤其是礙於疫情而深居簡出嘅獨居長者，就更需要外界嘅關心。Macy話佢每次做探訪都會帶啲小禮物，當中必定會有包米，因為佢會拎住包米祝老友記「最緊要有米 」，事關佢哋一聽到寓意財富嘅祝福語，就會眉開眼笑。Macy話老友記最想係有人陪佢哋傾吓偈，天南地北一番就已經好開心o架啦。
國際扶輪社3450地區總監翟慶聰醫生（Eric）都好認同Macy嘅睇法，早前扶輪社就組織一班中學生到長洲探訪獨居長者，但行程無奈受到新一波疫情影響而取消，不過同學都好有心思，親自畫咗啲心意卡送畀長者，一眾長者收到之後都好開心，Eric話做服務無分大小，最緊要係講心思。
張德熙最着重愉快安全
金銀業貿易場慈善基金主席張德熙（Haywood），指基金多年來都有做社會服務，眼見疫情下唔少長者都足不出戶，而農曆新年將至，諗住呼籲多啲老友一齊同長者拜個早年。結果好快就得到扶輪社嘅響應，仲派出八個分社一齊參與，可謂「一呼八應」。Haywood話做慈善服務最着重愉快同安全，基金曾經辦過千人盆菜宴，由挑選食材、運送以至場內每一盆盆菜加熱情況都有同事幫手睇實，保證大家食得開心又安心咁話。至於今次福袋內嘅食物全部都經佢哋親自過目，確保適合長者食用先至會放入袋o架。
卓妮