沙中線醜聞爆不停，港鐵獨立調查委員會尋日發表報告，話發現港鐵早已知道新東鐵嘅信號系統會令列車入錯行車線，竟然仲向政府匯報系統「安全及良好」。被問到係咪有員工須問責或離職，港鐵高層只係話已有人事程序作跟進。話時話，列車錯入行車線好大鑊，可能會撞車o架，港鐵相關人員竟然搵乘客安全較飛，對有冇職員被懲處答到咁含糊，人命關天，政府係港鐵嘅大股東絕對唔可以包庇，運輸及房屋局局長陳帆必須督促港鐵向公眾交代，否則港鐵變爛鐵，仲有乜用。
