中環出更：浸大新校長衞炳江上任 應對幻變時代
前年爆發反修例風波，至今仍未平息，再加上新冠肺炎爆發逾一年，市民生活喺惶恐之中，而香港浸會大學校長衞炳江尋日履新，成為浸大第6任校長，佢話大家置身喺不平凡嘅年代，孕育出精闢見解，卻無法洞悉前景，而佢就喺呢個充滿變數嘅環境下上任。
生活教育如走入虛擬世界
衞炳江尋日向全校師生同校友發電郵，講到歷時一年多嘅新冠肺炎疫情同日漸緊張嘅環球政治局勢，令過去熟悉嘅生活同教育都出現大變化，大家幾乎走進虛擬世界，工作、學習、互動都喺線上進行。佢感謝幾位浸大前任校長成就了現時的大學，會繼續帶領浸大以獨有的優勢，成為世界數一數二嘅研究型博雅大學。
佢話大學係孕育同創造新知嘅搖籃，當世界各國嘅關係變得千絲萬縷，新嘅挑戰亦如新冠肺炎般具有蔓延全球嘅威力時，研究人員必須打破學科嘅界限，通過合作提升研究嘅影響力，浸大正朝着呢個方向嘅發展，成立咗6所跨學科研究實驗室，喺3大重點研究領域開拓具強大影響力嘅研究，如藝術與創意媒體同科技嘅結合等。
雖然未來不可預測，但佢話教育工作者必須憑一己所知同遠見估量10年甚至20年後嘅境況，喺學術上作出明智嘅決定。佢認為教育學生應對未來嘅未知世界殊不容易，喺職能同學術知識之外，更重要是培養學生嘅創意、應變能力、靈活與同理心，以適應不斷變化嘅世界，欣賞生命嘅無限可能。
卓妮