中環出更：疫情未穩 鄧鉅明：新年謝絕探訪
第4波疫情未受控，政府尋日宣布延長一系列禁聚令措施至年初六，減少市民喺農曆新年期間聚集。其實卓妮早前喺某個場合撞到太子珠寶鐘錶集團主席鄧鉅明，佢已經話疫情仲未穩定，笑言新年都係「謝絕探訪」好啲，仲話即使冇得見面，都可以用電話通訊軟件視像拜年喎。
鄧鉅明坦言依家疫情肆虐，如果去拜年都會擔心朋友會怕有衞生問題，所以即使唔親身去拜年相信對方都會明白。佢又話今年新年社會氣氛都好負面，但認為要用樂觀態度面對，強調心態好重要，所以佢今年都會喺屋企擺放大吉同貼上揮春，增添多啲節日氣氛，又計劃買盆菜返屋企與家人一齊食團年飯。
全港各區工商聯青年企業家聯合會創會主席沈慧林同佢爸爸沈墨寧都在場，沈慧林話新年會留喺屋企陪吓家人，應該唔會外出拜年（口架）啦！佢仲話同父母住喺樓上樓下，而太太家人亦喺同區居住，所以過時過節都可以四代同堂相聚。雖然今年節日氣氛唔夠以前濃厚，但佢話好講究新年禮節，傳統派利是同貼揮春等都會做到足，希望囡囡仍然可以感受到農曆新年氣氛及習俗。佢仲話屋企嘅揮春都由太太90多歲嘅爺爺親筆寫添！
嚴徐玉珊：電話拜年都好方便
轉頭見到仁濟醫院董事局兩位前主席嚴徐玉珊同蘇陳偉香，嚴太就話喺呢個時勢應該留喺屋企同家人食團年飯就算，外出拜年嘅活動都係可免則免，認為大家都應該守吓規矩，等疫情好轉再約番朋友出嚟食飯都唔遲，又話依家用電話拜年都好方便。
卓妮